| ANGRY STUDIO-ն ուրախ է կինոսերներին ներկայանալ իր թարմ նախագծով, ինչը հայկական նորաստեղծ կարճամետրաժ ֆիլմերի խայտաբղետ հավաքածու է׃ Ներգրավված ութ գեղարվեստական ֆիլմերից յուրաքանչյուրը ստեղծված է առանձին ռեժիսորի կողմից՝ անհատական մոտեցմամբ׃ Երեք դրամա, երկու կատակերգություն, մեկ դետեկտիվ, մեկ հոգեբանական միստիկ թրիլեր ու ևս երկու արտհաուսային աշխատանք, այսինքն` ամենատարբեր մտքեր ու տրամադրություններ՝ տառապանք և երջանկություն, սարսափ և հումոր׃ Նախագծի ֆիլմերում հանդես են գալիս ինչպես արդեն ծանոթ և սիրված դերասաններ, այդպես էլ նորահայտ դեմքեր׃ - Մեր թիմը նպատակ ունի կինեմատիկ կամ սինեմատիկ /ծիծաղում է/ ալիք բարձրացնել՝ մի փոքր լճացման իրավիճակում գնվող հայկական կինոյում׃ Մեր ցանկությունն է նաեւ գեղարվեստական արժանիքներից բացի արտադրանքը հանդիսատեսին գրավիչ դարձնել մատչելիությամբ׃ Օրինակ, պլանավորել ենք ֆիլմերի DVD սկավառակները վաճառել անհամեմատ ցածր, եթե կուզեք՝ հակաճգնաժամային գներով, - ներքին խոհանոցի գաղտնիքներով է կիսվում Վահան Գասպարյանը՝ նախագծի պրոդյուսերն ու ստուդիայի համահիմնադիրը׃ Նախագծի աշխատանքները սկսվել են մայիս ամսից եւ այս պահին ընթանում են բուռն տեմպերով: Արդեն այս տարվա սեպտեմբերին ֆիլմերը կներկայացվեն «Մոսկվա» կինոթատրոնում, իսկ DVD սկավառակները կհայտնվեն Երևանի և ՀՀ մարզերի մասնագիտացված խանութներում׃ Ֆիլմերի մաասին պատմող նախնական տեսանյութերին կարող եք ծանոթանալ www.cinematic.am կայքում: |
